हुम्ला । काठमाडौँबाट रसुवागढी हुँदै केरुङ नाकाबाट तिब्बती मार्ग भएर हिल्सादेखि सिमकोटसम्म आउनुपर्ने खाद्यान्न हिल्सामा आई पुगको छ । केही दिन अगाडि काठमाडौँबाट ढुवानी सुरु भएको खाद्य व्यवस्था तथा व्यापार कम्पनी लिमिटेडको ढुवानी अनुदानको उक्त खाद्यान्न आइतबार नाम्खा गाउँपालिका वडा नम्वर ५ को हिल्सामा आई पुगेको हो ।

खाद्यान्न ढुवानीमा खटिनु भएका लिमिटेड हुम्ला शाखाका नायब सुब्बा नवीन आचार्यले रसुवागढीबाट केरुङ नाका हुँदै हिल्साका लागि खाद्यान्न चिनियाँ गाडीमा ढुवानी भएको बताए । लिमिटेडले हुम्लाका लागि उक्त नाका भएर पनि खाद्यान्न ढुवानी गर्दै आएको छ । सो मार्ग भएर यस आर्थिक वर्षमा ५ हजार क्विन्टल खाद्यान्न कोटा थियो । पहिले हिमपातले सडक अवरुद्ध भएको र हाल बाटो पनि खुलेपछि दूतावासबाट कागजात मिलाएर खाद्यान्न ढुवानी कार्य सुरु गरिएको सुव्बा आचार्यको भनाई छ ।

उनले केरुङ नाकाबाट तिब्बती मार्ग भएर चिनियाँ मालवाहक गाडीले पाँच दिन लगाएर खाद्यान्न हिल्सामा पुगाएको र हिल्साबाट नेपाली यातायातका साधनबाट नाम्खा गाउँपालिका केन्द्र याल्वाङ र सिमकोटमा ढुवानी कार्य गरिने बताए । जिल्लामा ढुवानी भएर आउने कुल खाद्यान्नमध्ये १ हजार क्विन्टल नाम्खा गाउँपालिकाका लागि याल्वाङमा छोडिने र ४ हजार क्विन्टल सिमकोटका लागि ढुवानी हुने संस्थानका प्रमुख कृष्ण प्रसाद अधिकारीले जानकारी दिए ।

लिमिटेडले थापाथली हुँदै याल्वाङसम्म प्रतिकेजी ४८ रुपियाँ र सिमकोटसम्म प्रतिकेजी ६२ रुपियाँमा ढुवानी दर तिर्ने भएको प्रमुख अधिकारीको भनाई छ । चिनियाँ दश वटा मालवाहक गाडीले प्रति गाडी ५ सय क्विन्टल खाद्यान्न हिल्सामा ढुवानी गरेका छन् ।