काठमाडौं । काठमाडौं महानगरपालिकाले चैत १५ गते भएको हिंसात्मक आन्दोलन गर्नेहरूलाई जरिवाना तोक्न अध्ययन टोली खटाएको छ ।

शहरी योजना आयोग, शहरी व्यवस्थापन विभाग, महानगर प्रहरी बल सहितको टोली बनाएर अध्ययन थालेको महानगरपालिका स्रोतले जनाएको छ ।

‘अन्य राजनीतिक दल वा समूहले गरेको जस्तो फोहोरको मात्रै जरिवाना गरेर हुँदैन, हिजो तोडफोड भएको छ । हाम्रै दमकल फुटाइएको छ,’ नगर प्रहरी बलका एक अधिकारीले बताए, ‘ट्राफिक लाइट भत्काउने काम भएको छ । शहर कुरुप भएको छ । सोही अनुसार अध्ययन गरेर जरिवाना आजै गर्दैछौं ।’

उनका अनुसार करिब १० लाख भन्दा धेरै जरिवाना गराउने तयारी रहेको छ । यसअघि नेकपा एमाले र राप्रपालाई आमसभा र र्‍याली गर्दा फोहोर गरेको भन्दै १-१ लाख जरिवाना गराएको थियो ।