सिमकोट । हुम्लाको दक्षिणि क्षेत्रको सर्केगाड बजारदेखि पैदल मार्गबाट खच्चडमा ढुवानी गरेर ल्याएको कुखुराको मासु नष्ट गरिएको छ । तीन दिन लगाएर सदरमुकाम सिमकोट ल्याएको वासी मासु बिक्री गर्न खोजेपछि सिमकोट गाउँपालिका पशु शाखाले व्यापारीबाट बरामद गर्दै नष्ट गरेको हो ।

०८० चैत २४ गते सुर्खेतबाट सर्केगार्ड गाउँपालिका–६ स्थित गीउसीसम्म गाडीमा र त्यस यता प्लास्टिकमा पोका पारेर खच्चडमा ढुवानी गरी ल्याएको ६० केजी मासु सदरमुकाम सिमकोटमा बरामद गरी चैत २६ गते नष्ट गरिएको शाखाका नायव पशु स्वास्थ्य प्राविधक विष्णु बुमीले जानकारी दिए ।

उनका अनुसार प्रहरीको गोप्य सुचनाका आधारमा सिमकोट स्थित छातिकोट फ्रेश हाउसको तीन दिनदेखिको बासी मासुलाई नष्ट गरिएको छ । फ्रेश हाउसलाई एक पटकका लागि चेतावनी दिदै माफि दिएको र यसपछि पनि यस्तो कार्य गरेमा कानुनी कारवाही गरिने कागज गरिएको छ । बरामद गरिएको उक्त मासुलाई गाडिनुका साथै अवदेखि यस्तो कार्य गर्न नमिल्ने भन्दै सचेतना गरिएको छ ।